因為台語足媠，值得一世人為伊拍拚佮傳承，因為愛台語，台語的工課按怎做都歡喜閣趣味。做台語予我的一生閣較有意義、閣較媠。---王秀容

「我咧唱歌」這本冊是一位投入閩南語教育真久長的國中老師所寫的，內底用真濟生活化、寫實派的閩南語音字，分享閩南語人生的平凡旅程佮世事感情。作者王秀容(現任新北市立五峰國中老師)一步一跤印，用一篇閣一篇的散文，若親像花蕊，綴每一篇的主題，恬恬仔開。誠歡喜家己佇遮佮逐家分享伊佇今年八月份才出版的新冊。因為教師社群的成立，我有機緣佮民富國小的三位閩南語老師共讀這本冊。這馬就對內底，選幾篇仔共逐家紹介佮分享。

若是講著「巷仔尾的雞牢仔」這篇，民富國小的雅珍老師講伊印象上深的，親像是「內籬仔」、「毛管空」、「販厝」、「阿西阿西」、「馬西馬西」、「餾」、「矮人規大節」、「手蹄仔」……這寡話語是伊的阿爸佮阿母四常會講著的，毋過傳到咱這代，遮的話語敢若強欲予咱放袂記得矣！看這本冊了後，一寡話一時佇耳空邊響起，予人一種親切的感覺。

佇咧「921大地動彼暝」這一篇，民富國小的美燕老師提起，若講著921，每一个台灣人心肝頭攏會搐一下。彼暝，咱每一个台灣人一定攏有家己的故事。作者當時是因為伊的查某囝破病，拄好蹛佇病院。伊共佇病院發生的每一个細節，攏寫甲袂輸拄才才佇眼前發生咧𫝛款，予人看著緊張兼刺激。閣較予人感動的，是阿母對囝兒序細的愛，透過作者的文字，深入讀文章的人的心肝底。

閣再來講「攢好咧等咱矣」這篇，民富國小的亞璇老師講著，當當伊看著這一篇的時陣，伊就感覺親像佇咧講伊過去的心情。想著當初時，伊為著欲考正式的老師，嘛是年年南北奔走，若想起彼幾冬的辛苦，干焦伊家己知影。佇文章內底，作者用一種正範又閣充滿希望的文字，「苦若是忍會過，人生就閣開出一蕊花」，輕輕仔講出佇心內的怨嘆。啊!這句話嘛予咱有真深的體會，希望家己會當佇拄著痛苦的時陣，用這款心情來提醒、鼓勵家己。

「人生的歌，本底就會唱無仝聲」

性命中對我好的人，予我愛佮支持；對我䆀的人，予我成長佮意志。人佮人的風風雨雨，我定定那行那唱歌，慶祝平安過一工，攏是緣分爾爾。---王秀容

國家語言發展法明確指示，未來佇民國110學年度，國中學生囝仔攏愛學本土語(特殊學生會使學台灣手語)，延續國小六冬的學習時數，共母語的文句、音字，用文學閱讀和文本理解的方式，繼續佇國中生湠，予咱後一輩的台語素養延續。雖罔佇師資、教材部分，閣猶未完全四序，咱佇遮先暫時莫討論，但是，對長期的教育發展來講，方向是正確的。

《我咧唱歌》這本冊看了，我推薦這本冊會當提來當做國中的閩南語教材。規本攏總有五十一篇散文，逐篇攏有有聲朗讀的QR Code，這是作者親身所錄的音檔，聽起來感情飽滇、真心自然。所以，我認為這本冊會使予已經有學過閩南語基礎的國中學生囝仔，當做文本、教材來讀；啊若咱做老師的，逐篇讀，讀了保證心適閣有滋味。

人生路途若唱歌，台語鬥陣來做伴

有一群時時聚集的社群同伴，有夠幸福